रसुवा— गोसाइँकुण्ड गाउँपालिकाले गर्भवती महिलाहरूका लागि सञ्चालनमा ल्याएको निःशुल्क घुम्ती ग्रामीण भिडियो एक्स–रे सेवाबाट हालसम्म पाँच सयभन्दा बढी गर्भवती महिलाले लाभ उठाएका छन् ।
गाउँपालिकाले आर्थिक वर्ष ०७७÷०७८ देखि गर्भवती महिलालाई लक्षित गरी यो सेवा प्रारम्भ गरेको हो । चालु आर्थिक वर्षको पहिलो चौमासिकमा २२ जना गर्भवतीले सेवा प्राप्त गरिसकेको गाउँपालिका स्वास्थ्य शाखाका प्रमुख बिमल घिमिरेले बताए । उनले भने सेवा सुरु भएदेखि हालसम्म पाँच सयभन्दा बढी गर्भवतीले लाभ लिएका छन् ।
यो सेवा पालिकाको ६ वटै वडाबाट नियमित रूपमा सञ्चालन हुंदै आएको छ । सेवा सुरु भएपछि दुर्गम बस्तीका गर्भवती महिलाले घर नजिकैको स्वास्थ्य संस्थामा आवश्यक स्वास्थ्य परीक्षण गराउने सुविधा पाएका छन् ।
यस सेवाले गर्भवती महिलाहरूलाई जिल्ला अस्पताल वा टाढाका स्वास्थ्य संस्थासम्म धाउनुपर्ने बाध्यता हटाएको गोसाइँकुण्ड गाउँपालिका अध्यक्ष कैसाङ नुर्पु तामाङले बताए । उनले भने, “भौगोलिक जटिलता र यातायातको असुविधा रहेको दुर्गम गाउँका गर्भवती महिलाहरूका लागि यो सेवा अत्यन्तै प्रभावकारी बनेको छ ।”
गाउँ–गाउँका स्वास्थ्य चौकीमै पुगेर सेवा उपलब्ध गराइएकाले गर्भावस्थामा हुन सक्ने जटिलता प्रारम्भिक चरणमै पहिचान भई उपचार तथा परामर्श लिन सहज भएको गाउँपालिकाले जनाएको छ ।
सम्बन्धित खवर
